MATALOBOS : TEMPORADA 2 - CAPITULO 41
Sempre hai unha luz ao final do túnel e Carmelo sempre está disposto a perseguila, porque por moitas dificultades que teña, a capacidade do xefe dos Matalobos para saír adiante parece non ter fin. Un dos asuntos máis complicados para o clan é saber protexer os seus segredos e non deixar cabos soltos, como sucede con Xabi Valiño, vello coñecido tanto da garda civil coma dos Matalobos, desesperado por conseguir diñeiro para a súa próxima dose, que está disposto a pasar información sobre o clan á cabo Seijas. Perseguido polos narcotraficantes e ignorado polas autoridades, Xabi Valiño deposita todas as súas esperanzas na cabo e ignora que a credibilidade de Seijas non pasa polo seu mellor momento, xa que asuntos internos, por recomendación do capitán Matalobos, comeza unha investigación sobre ela, así que o futuro da axente no corpo é cada vez máis incerto.
Pero para Carmelo o máis importante neste momento é manter a seguridade do clan, grazas a que cos micrófonos instalados na casa de Sara Campos pode adiantarse aos pasos da garda civil e dálle tempo a desmontar a súa rede de tráfico de haxix sen consecuencias graves. En canto ao persoal, o divorcio dos Matalobos está a punto de deixar de ser un problema, con Belén, a avogada de Bárbara, xogando ao seu favor.
No hay comentarios:
Publicar un comentario