A DO MARISCO

MATALOBOS : TEMPORADA 1 - CAPITULO 11

A do marisco é o título desta nova entrega da serie "Matalobos" en que se asistirá á saída de Bárbara Juve da casa dos Matalobos. O martes pasado os espectadores da TVG presenciaron como Bárbara lle daba a noticia a seu marido, Carmelo. Decidiu abandonar a casa familiar e quere levarse a seu fillo Iván. Que fará o xefe do clan máis poderoso de Sardiñeira para evitar a ruptura? Para os Matalobos a familia é o primeiro, pero parece que as ameazas de Carmelo a fixeron reaccionar. Ademais desde hai tempo colabora en secreto coa Garda Civil.

Mentres tanto o tenente Táboas e seus homes seguen con certo escepticismo o ronsel do buque Cartagena. A persecución da Garda Civil parece espertar o enxeño de Carmelo, que prepara algo moi especial para a descarga inminente da droga.